Dheeraj Kumar Dies: જાણીતા અભિનેતા-દિગ્દર્શક ધીરજ કુમારના ચાહકો માટે દુઃખદ સમાચાર છે. ધીરજ કુમારનું મંગળવારે 80 વર્ષની વયે મુંબઈની કોકિલાબેન હોસ્પિટલમાં બીમારીને કારણે અવસાન થયું છે. તેમને ગંભીર ન્યુમોનિયા ચેપ લાગ્યો હતો અને તેના કારણે તેમને સોમવારે અંધેરીની કોકિલાબેન ધીરુભાઈ અંબાણી હોસ્પિટલમાં દાખલ કરવામાં આવ્યા હતા.
તેમની તબિયત વધુ ખરાબ થતાં ICUમાં વેન્ટિલેટર સપોર્ટ પર મૂકવામાં આવ્યા હતા પરંતુ તેમની તબિયતમાં કોઈ સુધારો થયો ન હતો અને તેમણે મંગળવારે અંતિમ શ્વાસ લીધા હતા.
એક યુગનો અંત
ધીરજ કુમારે 1970ના દાયકામાં અભિનેતા તરીકેની કારકિર્દીની શરૂઆત કરી હતી. તેમણે અનેક હિન્દી ફિલ્મોમાં અભિનય કર્યો હતો અને પોતાના ગંભીર અને સંવેદનશીલ અભિનયથી દર્શકોના દિલ જીતી લીધા હતા.ત્યાર બાદ તેમણે ટેલિવિઝન ઉદ્યોગમાં પ્રવેશ કર્યો હતો અને એક સફળ નિર્માતા-દિગ્દર્શક તરીકે પોતાની ઓળખ બનાવી હતી.
દૂરદર્શન પર પ્રસારિત થતી ‘ઓમ નમઃ શિવાય’ જેવી ધાર્મિક ધારાવાહિકોથી તેમને ખૂબ ખ્યાતિ મળી હતી અને તે ખૂબ જ લોકપ્રિય બની ગયા હતા. આ ઉપરાંત તેમણે ‘સાઈ બાબા’, ‘કન્હૈયા’, ‘શ્રી ગણેશ’ જેવી ઘણી ધારાવાહિકોનું નિર્માણ કર્યું હતું, જે ભારતીય સંસ્કૃતિ, આધ્યાત્મિકતા અને નૈતિક મૂલ્યોને સ્પષ્ટપણે પ્રતિબિંબિત કરે છે.
